Plantun de Prouvènço

Pèr coumpara dos planto d'encò nostre

Bupleurum subovatum & Picea abies

Bupleurum subovatum

Apiaceae Umbelliferae

Nom en français : Buplèvre ovale.

Descripcioun :
L'erbo-coupiero, di proun rare à l'ouro d'aro, trachis dins li champ e ermas en agriculturo bioulougico. Soun mitan primàri sèmblo bèn èstre la garrigo. Se recounèis à si fueio óuvalo un pau longo, qu'entouron la cambo (perso-fueio). Sis oumbello an de 2 à 3 raioun, ço que lou destrìo de Bupleurum rotundifolium que n'en a de 4 à 8 que se vèi dins li mémis endré. La planto èi marcado sus listo roujo, categourìo EN, en dangié.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 50 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Bupleurum
Famiho : Apiaceae
Famiho classico : Umbelliferae

Ordre : Apiales

Coulour de la flour : Jauno
Petalo : 5
Ø (o loungour) enflourejado : 1 à 2 cm
Flourido : Printèms - Estiéu

Sòu : Ca
Autour basso e auto : 0 à 600 m
Aparado : Noun
Remarco : Champ de cerealo
Abriéu à juliet

Liò : Champ - Ermas - Óuliveto - Garrigo
Estànci : Mesoumediterran à Coulinen
Couroulougi : Mediterrano-touranienno
Ref. sc. : Bupleurum subovatum Link ex Spreng., 1813 (= Bupleurum protractum Hoffmanns. & Link )

Serento

Picea abies

Pinaceae

Àutri noum : Serénta, Sarento, Sourento, Serinte, Sùfi.

Noms en français : Epicéa, Épicéa commun.

Descripcioun :
Pèr pas s'engana emé lou sapin fau regarda coume soun lis aguio o peréu li pigno (o vacheto). Li fueio de la serento soun estacado tout à l'entour de la ramo coume uno brosso, au contro de li dóu sap que soun tóuti dins lou meme plan coume un penche. De nouta pamens qu'acò marcho pas pèr d'ùni sap fourestié (coume Abies pinsapo). Li pigno pendoulon, alor qu'encò dóu sap, quouro li poudès vèire, se tènon bèn drecho.

Usanço :
I'a touto meno d'utilisacioun dóu bos segound sa qualita. La pegoulo (resino) èi di proun vulneràri. Foundudo, servié, à passa tèms, pèr sougna li tigno (J.-R. Fortoul). Li jóuini fueio soun manjadisso (ensalado, pèis), an lou goust de citroun.